أسئلة لو سئلتها لحد .. ممكن يرميك بأي حاجة .. ده لو خد باله

عدنا .. معكم بعد الفاصل

أسئلة تحرق الدم .. بنتعرض ليها في حياتنا .. لدرجة اننا بنقولها دون الاحساس بها أو التفكر فيها

أنت قاعد في اودتك علي السرير وطافي النور وحاطط فوقيك ستمية بطانية
يجي أخوك الظريف يسألك : ايه ده انت حتنام
(معتقدش انى هرقص وازغرط يعنى .. وتقوم راميه باي حاجة)


انتم معزومين عند الناس أول مارحتولهم البيت فتحو الباب يقول
ابنهم االصغير انتو جيتوا
( لا شوية كده وهنيجي )


أنت خارج وركبت العربية وبتدور و طالع ويجي البواب يقول لك أنت رايح الشغل يا بيه
( لا نازل أخد دش في العربية)
يانفووووووووووووخي

مسكت التليفون وبتضغط على الأرقام يجى حد يقولك أنت هتتكلم فى التليفون؟
( تروح رامي السماعة في وشه )


ربنا فاتح عليك وماسكلك كتاب وقاعد بتحفظ متحمس ( أول مره بقى ) ويجي حد يقولك ها قاعد بتذاكر ياولد
(تقوم رامي الكتاب وقايل يلعن أبو المذاكرة )


ولا بقي القنوات و اسئلتهم البايخة برنامج إهداء أغاني ترد عليك (ست الكتكوتة) المذيعة بكل خفة ورشاقة أنت بتحب الأغنية دى؟
(لا أنا طالبها أنكد على نفسى )


أو مثلا في برامج العيد
المذيع "ههههه هههه نتعرف بيك؟
المواطن فلان الفلانى
المذيع "هههه بتقول اية للأهل هههه وصحابك هههههه وقرايبك هههه
المواطن اقولهم كل عام وانتم بخير
(اكيد مش هيقولهم البقاء لله)


المذيعة الظريفة"وياترى هتعملوا ايه فى العيد هتقضوه ازاى أكيد هيبقى زيارات الأهل والأصحاب وتفسحوا أولادكوا ونتصل بالمعارف ونقولهم كل سنة وانتم طيبين
( طيب هي سابت للراجل يقول ايه بقي)


والسخف بقي برامج الأطفال .... الشلل الكبير
المذيع" أنت بتحب بابا وماما
( ربنا ياخدكوا هو الطفل هتسألوه بيحبهم ولا لا .. السؤال دايما بيبقي في المواضيع المتقلبة.. غلطة يقع بها معظم مذيعي الاطفال )

رايح لبتاع العيش تقوله مثلا هات ب 2 جنيه (عيش)...؟
(يعني هو الراجل هيبيع بومب يعني )


لا وبرده ممكن تبقي نايم وبتحلم احلام جميلة ....... وييجي حد يزقك يجيب كليتك الشمال ويقولك ( ايه انت نمت يا بني ) اااااااااااااااخ

( لا .. بلعب كورة مع الشياطين )

وعذرا علي الإطالة ....... وياريت أي حد عنده أسئلة زي ديه اتعرض ليها يقولها

وعلي فكرة ...... بعض هذه الأسئلة منقولة .... والبعض الآخر من وحي الواقع والخيال

ونلتقي بعد الفاصل